21 верасня ў кінатэатры «КАРО.Арт» адбудзецца паказ фільма беларускай рэжысёркi Улады Сяньковай «II» з удзелам кінакрытыка Антона Доліна. Акрамя гэтага, фільм цяпер даступны анлайн: лічбавы рэліз карціны адбыўся ва ўсіх анлайн-кінатэатрах Расіі. Сацыяльны кінапраект пра праблемы і актуальныя пытаннi падлеткаў створаны з дапамогай Цэнтра візуальных і выканальніцкіх мастацтваў «АРТ Карпарэйшн» і Інстытута ЮНЕСКА па інфармацыйным тэхналогіям у адукацыі.
Героі фільма «II» – 16-гадовыя школьнікі Саша, Насця і Крысціна – вучацца ў дзесятым класе і жывуць звычайным жыццём падлеткаў: урокі, рэпетытары, паходы ў кіно, вечарынкі. Але аднойчы школу трасе навіна, з-за якой усе страхі і забабоны вылезуць вонкі.
Фільм Улады Сяньковай зняты ў блізкiм да дакументальнага стылі – так тэмы, якія ў публічным прасторы і ў мастацтве падымаць не прынята, гучаць яшчэ больш пераканаўча. Гэта кіно пра тое, ці вольныя падлеткі ў сваіх прадузятасцях і ці могуць быць памяркоўнымі, пра важнасць дыялогу паміж бацькамі і іх дзецьмі і пра тое, да якіх наступстваў можа прывесці чалавечая абыякавасць.
Галоўныя ролі ў фільме выканалі маладыя акцёры Аліна Юхневіч, Аляксей Вайніловіч і Iларыя Шашко. Трэйлер фільма даступны па спасылке.
Сусветная прэм’ера карціны пра каханне і сяброўства, страх, булiнг, стасункi з бацькамі тых, каму цяпер не больш за 20 гадоў, адбылася ў кастрычніку 2019 года на Варшаўскім міжнародным кінафестывалі – адным з найбуйнейшых кінафорумаў Еўропы, дзе атрымала Спецыяльную згадку журы. Пасля гэтага карціна была ў беларускім пракаце, а цяпер даступна анлайн і на тэрыторыі Расіі.
Наталля Сэрэбракова з «Афішы Daily» так характарызуе рэжысёрскі почырк Улады Сяньковай: «Свежасць погляду, любоў, з якой яна здымае падлеткаў, імклівасць, з якой развіваюцца падзеі, робяць сваю справу. У карціне як быццам няма ні адной лішняй сцэны або лішняга кадра. Гэта сапраўдная драма, якая здольна раніць вас у самае сэрца».
Сама рэжысёрка падкрэслівае, што фільм стаў яшчэ актуальней ў межах падзей, якія адбываюцца ў Беларусі ў дадзены момант і выказвае ўпэўненасць, што маладое пакаленне можа пабудаваць будучыню краіны: «Гэта кіно пра новае пакаленне, пра пакаленне, якое не баіцца, не здаецца, не прымае. Гэта кіно пра вялікую прорву паміж пакаленнямі, такія «Бацькі і дзеці». Belarusian Limited Edition. Мне вельмі важна, што гэта кіно выйшла ў пракат у Расiі цяпер, калі жудасная прапаганда льецца з кожнага праса. Я рада паказаць вам сапраўднага беларуса, які хоча міра, дабра, любові, волі і пераменаў».
Спецыяльны паказ фільма 21 верасня 2020 года адбудзецца ў межах праекта кінатэатра «КАРО.Арт» і кінакампаніі «Рускі рэпартаж». Пасля прагляду гледачы змогуць далучыцца да zoom-сустрэчы з рэжысёрам Уладай Сяньковай і акцёрам Аляксандрам Лесько. Мадэратарам спецыяльнага паказа выступіць кінакрытык, галоўны рэдактар часопіса «Мастацтва кіно» Антон Долін.
Акрамя гэтага, карціну «II» ужо можна паглядзець у анлайн-кінатэатрах «Кинопоиск HD», OKKO, Ivi, Start, MegaLabs, Wink, Beeline.TV, Premier, Dom.ru, Kino.1tv.ru, Smotri.mail.ru , Nonfiction.film, Aikino !, Voka TV, iTunes, Google Play і іншых.